Epesus 4 : 1 – 7 !! Ambilan Minggu 1 Agustus 2021

        Itongos Paulus surat Epesus on aima dalam rangka patorsahon pangarusion ni kuria pasal sonaha so sasintongni marhasadaon ibagas Kristus. Ijia boi do halak Kristen na marasal humbani Jahudi mangahapkon lobih “hebat” sidea marimbang na marasal humbani sipajuh begu-begu. Sebalikni pe boi homa terjadi, na marasal humbani sipajub begu-begu merasa “minder”. Agepe domma ibagas sada tumpuan, tapi lape ibagas hasadaon na sintong, marsibaoan “ego” ni bei do. Tontu anggo sonon do marhasadaon, gabe boi do urah posah janah urah homa ipalindak-lindak (igoncang) na masa atap keadaan na adong isekitar ni tumpuan ai. Apalagi ma kota Epesus (kota perdagangan) ijia na terkenal gabe lahan subur sipajuh begu-begu, buei do ijai parsombahon hubani dewa/dewi. Sada na terkenal aima dewi Artemis, na ija pemujaan dompak dewi on somalni irik do hubani horja-horja habutakon secara seksual (paromban diri hubani pelacur-pelacur sanggah ibagas parsombahon). Anggo lang kokoh pangarusiaon pasal hasadaon dalam arti hasadaon pakon Kristus, boi do magou sidea halani doras ni pengaruh luar.

        Aha do na porlu ialimhon hita ibagas goluh on domu hubani hasadaon ibagas Kristus? Hasadaon na marbona humbani hauhuron ni Kristus. (ay. 2) Langkah na parlobei ase boi das hita hubani hasadaon ibagas Kristus aima anggo dong sikap martoruh ni uhur, marlamlam anjaha marlumbang ni uhur, ampa marsianjuan ma nasiam ibagas uhur na holong! (rendah hati, lemah lembut, dan sabar). Paruhuron na sonon lambin isempurnahon sanggah sirsir hita bani horja marsiurupan i tongah-tongah ni tumpuan. Songon na isuratkon bani Pilipi 2:5, songon paruhuron ni Kristus ma paruhuron nasiam ibagas tumpuan. Paruhuran na sonon porlu tumang dong banta rombang, ai on do modal utama banta ibagas na mandompakkon bagei ni tantangan ampa perbedaan na dong banta.

        Porluhon anjaha ramotkon hita ma hasadaon ni tonduy (ay.3-6). Iajarhon Paulus do hubanta porluni manramotkon hasadaon, marhitei dasar-dasar (pundasi) ni hasadaonta ase totap ibagas harosuh ni Tuhan, aima sada daging anjaha sada tonduy. Ningon sarupa do pangarusionta paboa, porini pe berbeda-beda do hita ibagas suku, keadaan, status sosial, tapi dos do hita ibagas pandiloon ni Kristus ai. Marsada do hita anjaha ipadomu sada Ulu, aima Kristus in sandiri. Marsombah hu-Bani do hita ganupan. Anjaha marhiteihon ai porlu hita riap manlangkah ibagas sada pangarapan. Riap mangarap do hita hubani haluahon ampa hagoluhan na pinasirsirni Kristus. Sada haporsayaon; riap do hita manghaporsayai paboa haluahonta aima marhitei na Kristus na dob manggalangkon diriNi bahen tobus ni jolma, lang halani horja atap na patut hita manjalohon ai. Marhiteihon ni ai gabe sada do hita ibagas pandidion na dos, aima ididi (ipamasuk) hubagas hamateian ampa parpuhoon ni Kristus, na hinorjahon ni Naibata na sada in aima TUHAN na gabe Bapa banta, sdo dewi Artemis atap naibata-naibata na i dunia on.

        Pakei hita ma sibere-bere na humbani Kristus in dalam rangka “saling melengkapi” (ayat 7). Ibere Naibata do hubani jolma sibere-bere idop ni uhur domu hubani pambere-Ni. Palegan-legan do sibere-bere ai iondoskon hubanta, halani ai domu hubani pambere ni aima horjahon hita na marguna i tongah-tongah ni hasadaon (boi ibasa bani Rom 12:6-8). Jadi fokus ni hasadaon ibagas Kristus aima “saling melengkapi” na sada dompak na legan domu hubani na jinalonta humbani Tuhan in. Ulang ma sibere-bere ai mambahen lambin daoh anjaha ipakei hita homa laho paetekkon halak na legan. Pakei hita masa pandemi Covid 19 on laho paorodkon hasadaonta hubani Tuhan age hubani sesama. Ibagas keluarga, sonaha parsaoran ni orangtua pakon niombah, pakon hasoman sahorja, hubungan ni parhorja juma tanganan pakon pagorini kuria pakon sebalikni. Tongon tantangan do banta na masa on, tapi boi ipakei hita on laho pajngeskon kualitasni parsaoran ni halak na porsaya. Amen

2 Musa 16:11-18 !! SIbasaon Minggu 1 Agustus 2021

        Buku 2 Musa on marisihon pasal sonaha Naibata padaratkon halak Israel hun tanoh parjabolonan Masir mulak hubani tanoh Kanaan. Bagei do proses na binahen ni Naibata laho padaratkon sidea marhitei halongangan na ipatalar ilobei-lobei ni bangsa Masir sonai age sanggah ibagas pardalanan i halimisan. Sedo ase luar tumang sidea hun parjabolonan, tapi ase gabe bangsa na banggal do sidea songon na ipadankon hinan bani bapa ni sidea, Abraham. Menurut pangakuan iman ni Israel, sasintongni peristiwa sibanggalan bani goluhni sidea aima sanggah Naibata padaratkon sidea hun Masir, rumah parjabolonan ai. Anggo adong atap aha na ihamalaskon anjaha na mambahen pusok uhur ni sidea, idingat atap ipaingat do sidea pasal haluahon banggal on.

        Agepe domma ipadarat Naibata bangsa ai hun rumah parjabolonan marhitei na ipatalar Naibata do halongangan ilobei ni raja Parao marhitei marmateian anak bunga tubuh ni halak Masir, marhitei na boi sidea mandipari laut sigerger, lang ope mintor boi iarusi sidea sonaha pambobaion ampa tujuan ni Naibata. Sanggah ipardalanan, bani ari sapuluh lima, bani bulan dua, dob luar sidea hun tanoh Masir, masa ma parungut-unguton bani bangsa ai. Marungut-ungut do sidea dompak Musa ampa si Aron pasal “aha ma siinumonnami? (15:24), “Ambit matei ma namin hanami ibunuh tangan ni Jahowa i tanoh Masir, sanggah na hundul hanami ilambung ni hudon na marisi gulei, sanggah na bosur hanami mangan ruti; ai iarahkon hanima do hanami luar hu halimisan on laho mamunuh ganup tumpuan on marhitei lohei” (16:3). Bani pangidah ni bangsa ai, songon na ibobai do sidea hu hamateian, isalahkon sidea do Musa, bahkan isalahkon sidea do tindakan ni Naibata na dob padaratkon sidea hun Masir.

        Sirsir do Naibata ‘mambogei’ atap manangihon ungut-ungut ni bangsa ai. Nini dompak Musa “Domma hubogei parungut-unguton ni halak Israel”. Sanggah na marungut-ungut sidea pasal bah inumon, ibere Naibata do sidea bah, sonai do homa ibagas panorang on sihol do bereon ni Naibata hubani sidea gulei pakon ruti songon pangindoan ni sidea ai. Porlu do icatat paboa porini pe ibere Naibata ai bani sidea, sedo dalam rangka “mansuhuni” ungut-ungut ni sidea ai. Tapi songon na isobut bani ayat 12 ai do “ase ibotoh hanima, Ahu do Jahowa Naibatanima”. Sihol marhitei na masa ai, lambin ibotoh bangsa ai ma sonaha holong ampa pansarihonon ni Naibata hubani sidea domu hubani padan-Ni na dob ibulawankon dompak Israel.

        Sonaha do Naibata pasirsirhon na porlu bani bangsa ai? Untuk haporluan bodari, iparoh Naibata ma marhulan-hulan leto ampa bani sogod ni ari marhitei sipanganon na roh marhitei namur.  Menurut penelitian, parroh ni leto ai aima hulanan na na somal “melewati’ dolog Sinai bani musim tertentu. Tapi anggo na isaksihon bangsa Israel na roh siap sogot aima marhitai na adong ma marrageian bani halimisan ai songon batu ni ambotik na matah paretekni pakon parhibulni. Parohkon sukkun-sukkun do on bani halak Israel, sanggah ididah sidea ai marsisukkunan do sidea samah sidea mangkatahon “Aha do on?”. Anjaha lanjar sukkun-sukkun on do na gabe goranni sipanganon ai ronsi sonari, aima “Manna” na bani hata aslini isobut “Man hu”. Musa do na patorangkon paboa Manna ai aima ruti na binere ni Jahowa hubani nasiam bahen sipanganon. On ma jenis sipanganon na boi langsung ipangan, lang porlu iolah be anjaha lang boi iolah be gabe sipanganon na boi isimpan dokah. Tujuanni pambere ni Naibata on aima ase bangsa ai mambotoh paboa na tarpasirsir Naibata do haporluan ni sidea ibagas “pardalanan” huja bangsa itogu Naibata.

        Adong do ibahen Naibata “tonah” sonaha sidea maningon manjalohon ampa mangankon ai. On ma tonah ai “Patumpu nasiam ma hunjin ganup marguru hubani na sungkup panganonni; satumba sahalak boi buatonnasiam hubani hasomanni salampo-lampo, marguru hubani buei ni bilangannasiam”. Adong pembatasan na boi patumpuon ni sidea, “satumba sahalak”, domu hubani bilanganni na sarumah. Ijon ma Naibata mangajar bangsa ai sada disiplin mangan, sonaha ase ganup dapotan. Ambahni mambahen bosur, sipanganon na binere ni Naibata ai mangajari sidea saling perduli ibagas kebersamaan, lang serakah. Sedo ase mamingkirhon boltok tumang anjaha gabe jolma na serakah hita itobus. Tapi gabe bangsa na memiliki disiplin iman do, na mardalan ibagas pembatasan na itotapkon Naibata. Boi do irenungkon hita “pembatasan-pembatasan” ibagas panorang pandemi Covid 19 on. Nini uhurta boi do on mambahen maruntol hita, tapi boi do homa on mambahen hita lambin “pentar”, lambin disiplin, lambin sadar bani hagalekon-hagalekonta. Songon na ibatasai hita secara sosial, tapi boi do homa on menyadarhon hita paboa na dihut do hita martanggungjawab manjaga hasomanta, hasadaonta marhitei ma na mematuhi Protokol Kesehatan na ianjurhon hubanta. Pakei hita ma masa-masa sulit on laho manramotkon hasadaonta samah hita sonai age hasadaonta dompak Tuhan Naibata. Amen 

Salam Buat SD GKPS Sibarou