MALUAH LAHO MARBUAH

1 Musa 8 : 18 – 22

1.      Bah Nasumbang pakon Parau

Bah Nasumbang. Ra anggo ibandingkon hubani na ongga ialami jolma bani panorang parpudi on, lang adong sada na masa na boi gabe perbandinganni. Tongon adong do banjir itangar hita bani piga-piga ianan i tanoh on. Bahkan adong do masa gempa pakon tsuname na boi mambahen ‘bois’ marribu-ribu humbani jolma na i atas tanoh on halani na masa ai. Bani na manangar barita in buei do jolma mabiar, bahkan hubani sidea na sompat dihut mengalami getaran ni ai adong na ‘trauma’ atap pe biar-biaran. Halani memang, lang adong be taridah gogoh ni hajolmaon laho mangelakkon anggo domma masa na masa in. Tontu boi ma ibayangkon hita naha use na margoran ‘bah nasumbang’ ai tene. Ganup tanoh on igoki bah, iboiskon ganup na marianan i tanoh on. Sada parlajaran na maharga na sihol buatonta aima bahasa Naibata lang mangharosuhkon dosa ai ‘berkembang’ janah ‘memenuhi’ tanoh on.  Aima ase nilai utama ni bah nasumbang sedo laho mamboiskon jolma hun tanoh on, tapi laho paluahkon dunia on do tene humbani dosa, ase imulai use babak kehidupan na baru, marhitei keluarga ni si Noak na iselamatkon ibagas sada Parau.

2.       Masuk anjaha luar marhitei Hata ni Jahowa

Songon sanggah parmasuk ni si Noak pakon keluarga sonai age binatang-binatang na sasapasang ai, sonai do si Noak lang luar sandiri ia humbagas parau ai, parentah ni Naibata do na ipaima anjaha na ibalosi. Parentah ni Naibata do na gabe kompas na menentuhon arah ni goluh. Menarik anggo ipardiatei hita na isobut bani ayat 18 : “Jadi luar ma si Noak.....”. Si Noak luar aima halani akibat ni Parentah ni Naibata, sedo inisiatif ni sandiri. Adong do prosesi ni panorang dob honsi soh bah nasumbang ai. Bani ari sapuluh pitu bulan pitu sangkot ma parau ni si Noak i pakpak ni dolog Ararat. Lambin ari lambin surut ma bah ai anjaha bani ari sada bulan sampuluh, taridah ma pakpak ni dolog-dolog. Ompat puluh ari dobkonsi ai, iungkab ma jendela anjaha ipaluah ma kawak ampa asas laho mambotoh atap na dob horah ma tanoh in. Pitu ari dob ai ipaluah ma use asas, mulak mamboan ranting ni hayu. Ipaima pitu ari ipaluah ma use asas, anjaha lang mulak be hubagas parau ai. Anjaha bani tahun pa 601 hon bani ari sada bulan sada domma ididah si Noak horah ma sisik ni tanoh ai. Tapi lape luar ia. Dob das pe ari dua puluh pitu bulan dua, horah ma tanoh ai, sanggah roh Hata ni Naibata mangkatahon ‘luar’, ijai pe ipungkah si Noak luar hun parau ai anjaha masuk ma ia pakon sagala pangisini parau ai hubani dunia na pinabayu ni Naibata. Ipaima do ‘iparsilahkon’ Naibata ia ase luar. Anggo buei jolma na bergantung hubani pambotohni (maaf, bapa gati ipaganjang gabe : bahat pambotoh), si Noak na age pe tangkas do adong pambotohni, tapi taridah do bahasa si Noak ‘luar’, sedo mengandalhon pambotohni, pangidah ampa perhitunganni. Buei  jolma madabuh anjaha margulut ibagas dosa, sasintongni sikkam mabarbar ni aima halani na so ihaporluhon jolma on be manangihon hata ni Naibata. Anggo si Noak onjolan ni langkahni memasuki dunia na pinabayu in aima Hata ampa Parentah ni Naibata do. Idingat si Noak do bahasa na marsuruhsi masuk hubagas parau anjaha luar humbani dunia na gok dosa ai, aima hata ampa parentah ni Naibata do hinan.

3.      Ganup do ipaluah Naibata

Sedo jolma tumang, tapi ganup na patut marianan i tanoh do ipaluah Naibata marhitei peristiwa bah na sumbang in. Istilah na legan mangkatahon : holistik. Sedo pitah si Noak, pakon keluarga ni na luar hun paraou ai, tapi haganup na pinaingkat ni Naibata masuk hu bagas parau ai (“Jadi luar ma si Noak rap pakon anakni, parinangonni ampa parinangon ni anakni ai. Sagala binatang liar, sagala na manjulur, sagala manuk-manuk ampa sagala na manggulmit iatas tanoh in, marsiboan masamni, luar ma homa hun parau ai.”). Adong ijon hata ‘sagala’ pakon ‘marsiboan masamni’, aima na mangkatahon haganup. Lang adong na tading sada pe. Hunjon taridah bahasa dunia na bayu ai sedo dunia na igantih pangisini, tapi ipabayu do tene haganup, ipaborsih humbani pengaruh ni dosa. Sonai ma anggo Naibata paluahkon ; sagala isini dunia on do na sihol paluahonNi. On ma homa na gabe missi ni halak na porsaya (Gereja) aima ase manghargahon anjaha manramotkon haganup na adong i atas tanoh on. Tontu sedo na asal dihut haganupan in ibahen Naibata. Adong do tujuan ni haganup na dihut i bagas parau ai, na marguna laho membangun hagoluhan on. Parau ai pakon ganup isini, aima patandahon hagoluhan na sihol toruskonon ni Naibata.

4.      Buah ni goluh ni halak na dob pinaluah.

On ma biak ampa abak na patut roh humbani halak na dob “luar” marhitei proses haluahon ni Naibata anjaha na dob “masuk” hubani dunia na bayu, na pinaluahni Naibata, aima :

a.       Paulihon anjap-anjap (mezbah = mizbēah)

Dob luar si Noak pakon ganup pangisini parau ai, na ijumpahkon aima suasana na baru. Sedo mintor soal sipanganon na ipingkirhon, atap parpodom-podoman na itorihi, tapi ianan na gijang do laho paulihon anjap-anjap (mezbah) bani Jahowa. Ibotoh do bahasa haluahon ai humbani Jahowa, aima ase goran ni Tuhan in do na parlobei ipasangap. Anjap-anjap aima dibangunnya kembali parsaoran na jenges pakon Naibata. Si Noak hadir sebagai tokoh na sirsir gabe pemimpin laho mambobahon keluargani, age rap pakon ganup na tinompa na legan ase tunduk anjaha marsombah hubani Naibata. Anggo sadarion  marpesta bapa GKPS, tontu laho patangkashon hajongnjongan ni bapa do in i tongah-tongah ni keluarga, kurai age masyarakat na gati isobut gabe pemimpin. Tapi nilai kepemimpinan na iharosuhkon aima na boi “pajongjongkon” parsaoran ni ganup pangisini keluarga pakon Naibata. Bapa aima pimpinan rohani, na pajongjongkon anjap-anjap laho paingatkon keluarga in bahasa haluahonta aima humbani Naibata, sedo halani gogoh ampa pambotohta. Ase goluhta na dob pinabayu ni Kristus pe sada do na porlu bahenonta aima membangun parsaoran pakon Naibata na paluahkon hita ai. Sada caranta aima manggalang.

b.      Manggalangkon galangan situtungon (korban bakaran = õlâ)

Galangan situtungon na isobut ijon aima na mararti “naik”. Timus ni galangan ai naik manuju hubani Naibata laho mamboan ucapan syukur ampa parsombahon ni halak na marsombah ai. Galangan na sonon isobut do homa gabe galangan  pardameian / pendamaian (2 Samuel 24:25) na isumbahkon halak na saluju laho martarima kasih. Galangan ampa sipanggalang na sonin do na hinarosuhkon ni Naibata, tulus dan mendalam.

5.      Dihut do masa depan ijamin Naibata

Isobut do bahasa dob ianggoh Naibata galangan na misbou ai, gabe roh do hata ni Naibata na mangkatahon : “lang be papaonku... seng be ripaskononku...seng anjai maronti be tidahan ampa parima..borgoh pakon ari na milas, logo ni ari ampa udan sonai arian pakon borngin”. Sedo galangan mambahen roh holong ni Naibata, tapi idop ni uhurNi domma ipatalar humbani na hinan. Holong ni Naibata do na marhorja ijon, ase patut ma hita marmalas ni uhur anggo boi ope jumpah hita ronsi sonari na ipadankon Naibata in. Selamat marmalas ni uhur ma homa hubani bapa sa GKPS. Amen