ULANG MABIAR, MARKUASA DO TUHAN PASIRSIR HAGOLUHANTA

Hesekiel 39 : 1 – 7

Goran Hesekiel mararti : "Naibata mampargogohi”. Sonaha ma Naibata patalarhon hagogohanni hubani bangsaNi..? Adong isobut bani teks ambilan on pasal Gog pakon Magog. Gog aima raja anjaha Magog aima tanohni. Anjaha Gog aima raja ni halak Ros, Mesek pakon Tubal. Tanoh Magog aima na hun utara. Manurut catatan ni nabi Jeremia 1:14, 4:6 “Dob ai nini Jahowa ma bangku: Hun utara do roh ni hasedaon bani sagala pangisi ni nagori on.”. Bani catatan ni buku Pangungkabon pe isobut do pasal on, age pe jaman ni domma berbeda. Nini : “Jadi luar ma ia pakahouhon sagala bangsa na bani na ompat deisa ni tanoh on, ai ma Gok pakon Magog, laho patumpuhon sidea hu parmunsuhan; ia bilangan ni sidea songon horsik na i topi ni laut do” (Pang.20:8). Daerah utara aima musuh ni Israel. Jadi boi do hatahonon, Gog pakon Magog aima na gabe symbol na pataridahkon adong kekuasaan na marmusuh dompak Israel, gabe ancaman. Sada gambaran kuasa ni musuh ni Israel na banggal. Simbol on boi hubunghononta hubani panjahhaion ni nabi Hesekiel on sanggah ibagas habuangan Babel halak Israel. Menurut catatan sejarah, dihut do homa age nabi Hesekiel ibagas habuangan ai, jadi panorang ai boi hatahonon panorang na idesak anjaha na iodoh-odoh bangsa Babel do Israel. Songon situasi ni buku Pangungkabon, na ija halak na porsaya iodoh-odoh musuh, sonai do homa age bani zaman ni nabi Hesekiel. Aima ase buei do bani buku nabi Hesekiel on jumpah hita
symbol-simbol rahasia (na lang iarusi halak Babel, tapi iarusi halak Israel) laho patorangkon pasal sonaha na sihol masa ibahen Naibata hu tongah-tongah ni bangsaNi ampa hubani musuh ni halak Israel. Termasuk ma Gog pakon Magog, sebagai perlambangan hubani kekuasaan ni Babel (par utara) na sedang menguasai bangsa ni Tuhan. Sonaha gogoh ni kuasa ni Gog ampa Magog pe ipatugah do marhiteihon “sior” na i tangan sambilouni, ampa “lingkit” na i tangan siamunni. Tangan, sior ampa lingkit aima symbol ni kekuasaan na gogoh. Simbol on laho patugahkon kuasa ai sihol mamboan Israel hubani hamateian. Lang tarkahua Israel laho manlawan ai dengan kekuatan ni sandiri na sanggah ibagas pangodoh-odohon.

Agepe isobut soal Gog ampa Magog, tapi hubani Israel do tujuan ni hata ni Naibata, aima laho patubuhkon pangarapan ase ulang lemah, tapi ase mangajamkon kuasa ampa hagogohon ni Naibata. Halani haluahon ni Israel sedo bani tangan ni musuh (banggal atap etek), tapi bani tangan ni Naibata do. Ai do ase roh Naibata use (adong homa isobut bani bindu 38) mangulaki patugahkon ase “manjahai” nabi Hesekiel pasal hata ni Naibata taringat hubani Gog ampa Magog . Nini Tuhan Jahowa pasal Gog ampa Magog: “Tonggor ma na roh ma Ahu mangimbang ho..”. Imbang ni Israel ibahen Naibata gabe imbangNi. Memang, Tuhan Jahowa do na manogu-nogu Gog ampa Magog ase roh hu Israel. Sedo mambahen hamateian bani Israel, tapi sihol Naibata laho patuduhkon hubani Israel ampa bangsa-bangsa do pasal hagogohonNi na boi mambahen “mapoyut” (poyaukononKu) hagogohon ni dunia on anjaha iondoskon do ai hubani manuk-manuk ampa binatang na i talun. Mapoyut = hancur/lang berdaya. Bani ayat 5 ihatahon do bahasa musuh ai ‘tompas’ anjaha tongoskonon ni Tuhan Jahowa do apuy bani Magog ampa halak na marsonang-sonang i topi ni laut.

Aha na isobut hata ni Naibata ijon, sasintongni laho patugahkon sada pengharapan do on bani Israel pasal masa depan ni sidea. Agepe sanggah ibagas sitaronon sidea sonari, tapi na sihol do roh Naibata bani masa depan ni sidea mambere hamonangan anjaha patuduhkon goluh na lang adong be parmusuhan. Goluh na gok damei, sonang anjaha totap ronsi sadokah ni dokahni. Sonin ma tongon goluh na sihol patuduhon ni Tuhan Jahowa hubani Israel, age hubanta na sanggah ibagas dunia on. Tongon, jumpah hita ope sonari sitaronon, na borat, bahkan musuh ibagas goluhta. Tapi adong do panorangni Tuhan Naibata patuduhkon hamuliaon ampa hapansingon ni goranNi itongah-tongah ni dunia on.

Humbani ambilan on jumpah hita do parlajaran pasal sonaha do goluhta on ilobei-lobei ni Naibata.
Sadokah goluh na i dunia on, sai na dong do musuh na sihol parsedahon hita, mambahen hita manaron. Tapi lang soh Naibata mangidah na hinaholonganNi, ai domma ipasirsir hamonangan banta, lang pitah hamonangan sonari, tapi das hubani masa depanta. Na so tarkahua hita (maluah humbani hamateian), domma ipasirsir Tuhanta in hubanta.
Bagah-bagah ni Tuhan in ma mamuhoi haporsayaon ampa pangarapanta. Porini pe maningon mandagei na marsik do hita i tanoh on, tapi dong do panorangni ‘mapoyut’ hagogohon ni musuhta ibahen Tuhan in.
Sonaha pe gogoh ni dunia on na boi mambahen halak na porsaya in manaron anjaha galek (kuasa, uang, jabatan, kemegahan), hape haganup boi mapoyut anjaha tompas, anjaha do dong do ujungni ibahen Tuhanta. Gogoh ni arta marpanorang do, gogoh ni sinadongan marsintig (terbatas) do, bahkan atap aha pe na dong banta na i dunia on… lang siajamhonon ai laho mangayaki hagoluhan na humbani Tuhan in. Ai terbatas do gogoh ni dunia on. IA do pasirsirhon ai bani halak na porsaya. Amen

ASP